La sculptura da Son Luzi e l'apparat da nivellaziun represchentan ils dus pols «crair e savair». Tge han las Grischunas ed ils Grischuns cret e savì, tge crain e san ellas ed els oz? Il cunfin tranter crair e savair n'è mai stà cler.

«Dieus e Dieu» illustrescha il svilup dals numerus dieus «pajauns» ad in Dieu cristian. Las «ditgas e legendas» tradiziunalas relatan, co che la vita reala vegn dumagnada e chapida. «Segns e miraclas» tracta reglas, avertiments ed eveniments. «Cretta e superstiziun» mussa la finala che omaduas furmas vivan anc adina.

«Naschientscha e mort» menziuna las enconuschientschas da la medischina, dentant er la pietad populara. Il local davart «scola e scola populara» e quel davart «stampats e stamparias» tematiseschan cunzunt il savair.

Crair e savair, dentant er – sco ch'i para – superstiziun, èn oz pli u main libramain en vendita sin il «martgà da las pussaivladads». La schelta è enorma e surpassa per bler la purschida da las baselgias tradiziunalas.