Nova exposiziun archeologica permanenta en il Museum retic

Chats e fatgs

Il museum retic ha fatg ses ultim pass vers la nova concepziun da sia exposiziun permanenta: Ils 14 da december 2011 vegn puspè avert il plaun sutterran.

En la nova exposiziun permanenta è mintga plaun deditgà ad in tema. «Pussanza e politica» hai num dapi l'onn 2007 sin l'emprim plaun. L'onn 2008 è vegni vitiers «Lavur e paun» sin la segunda etascha. L'onn 2009 è suandà «Crair e savair» sin la terza auzada. Cun l'archeologia ch'è vegnida concepida da nov en il plaun sutterran è ussa vegnida remplazzada dal tuttafatg l'exposiziun dals onns 1980. Il plaunterren resta reservà per las exposiziuns temporaras, il palantschin per la pedagogia da museum.

L'exposiziun d'archeologia en il plaun sutterran correspunda a las epocas enconuschentas. Ella cumenza cun il temp da crap e cun las restanzas las pli veglias d'abitadis en il Grischun da Cuira-Marsöl da circa 11'000 fin 9'500 avant Cristus. A partir dal temp da bronz tempriv datti ina colonisaziun nova intensiva dal territori alpin cun in augment correspundent dals objects da chat. Il temp da fier che suonda ha ses num dal fier che remplazza pli e pli il bronz. Enturn 15 avant Cristus vegn il Grischun actual conquistà dals Romans. Quai chaschuna er grondas midadas culturalas. L'ultim chapitel dal plaun sutterran è la finala il temp medieval tempriv (400 fin 800 suenter Cristus).

L'exposiziun è vegnida sviluppada en stretga collavuraziun cun il servetsch archeologic. In'attenziun speziala è vegnida dada als cumplexs da chats novs e fitg novs. Sco tar ils ulteriurs plauns è il biro gasser, derungs responsabel per ina concepziun che unescha il cuntegn e la furma en ina moda attractiva.

chats e fatgs: PDF 86 KB

Pussanza e politica

Lavur e paun

Crair e savair